लहान । मधेश प्रदेश प्रहरी प्रमुख डिआईजी ओम अधिकारीले प्रदेश मातहतका कार्यालय प्रमुखहरूलाई अपराध नियन्त्रण र शान्ति सुरक्षालाई थप प्रभावकारी बनाउन कडा निर्देशन दिनुभएको छ।
डिआईजी अधिकारीले आज भर्चुअल माध्यममार्फत मातहतका कार्यालय प्रमुखहरूसँग समसामयिक सुरक्षा विषयमा छलफल गर्दै प्रदेशभित्र हुने आपराधिक गतिविधि, गुण्डागर्दी, भन्सार छली तथा अन्य गैरकानुनी कार्यविरुद्ध कडाइका साथ प्रस्तुत हुन निर्देशन दिनुभएको हो।
उहाँले गैरकानुनी गतिविधिमा शून्य सहनशीलताको नीति अपनाउँदै कानुन कार्यान्वयनमा कुनै प्रकारको सम्झौता नगर्न स्पष्ट निर्देशन दिनुभएको छ।
विशेषगरी सीमावर्ती क्षेत्रमा हुने अवैध तस्करी, लागुऔषध ओसारपसार तथा संगठित अपराध नियन्त्रणका लागि विशेष सुरक्षा योजना बनाएर प्रभावकारी रूपमा प्रहरी परिचालन गर्न डिआईजी अधिकारीले आग्रह गर्नुभएको छ।
अपराध नियन्त्रणसँगै प्रहरी सेवा जनउत्तरदायी, पारदर्शी र प्रभावकारी हुनुपर्नेमा जोड दिँदै डिआईजी अधिकारीले शान्ति सुरक्षा कायम गर्ने जिम्मेवारीलाई उच्च प्राथमिकतामा राख्न निर्देशन दिनुभएको छ।
प्रहरीको सक्रियता, अनुशासन र जिम्मेवारीपूर्ण कार्यसम्पादनले मात्र नागरिकमा सुरक्षाको अनुभूति र राज्यप्रतिको विश्वास बलियो बन्ने भएकाले प्रत्येक प्रहरी कर्मचारीले आफ्नो कर्तव्यलाई इमानदारीका साथ निर्वाह गर्नुपर्ने सन्देश उहाँको निर्देशनमा देखिन्छ।
अपराधीप्रति कडाइ, नागरिकप्रति जिम्मेवारी—यही हो जनमुखी प्रहरी सेवाको पहिचान।
